miércoles, 28 de abril de 2010

HOXE MULLERES DA RAIA E POSTERIOR DEBATE NA TVG AS 00:45

7 comentarios




Mulleres da Raia, o documental da fronteira vaise emitir hoxe na Televisión Galega no horario de madrugada. Despois do partido da Champions League e da comedia lixeira de Adam Sandler, veremos se os espectadores teñen fólego para o filme e posterior debate no programa Galicia Doc. É unha boa nova que a televisión pública aposte pólo xénero documental e aproveite o espacio de conversa que provoca o cinema de realidade, como instrumento de análise da construcción da nosa comunidade e diagnóstico da nosa actualidade. Pero de novo, limítase o acceso a este tipo de programas co horario marxinal asignado na grella de programación. O público que padece de insomnio ou o que no dia seguinte non se ergue cedo para traballar, como os 236.000 parados en Galicia, poderán ter certa predisposición para dixerir o discurso televisivo as 00:45h da madrugada, 23:45h para os espectadores do pais veciño. O tratamento dos programas culturais como productos residuais é contrario ó servicio público que a televisión de todos ten a obriga de cumprir. Unha constante na televisión pública cando ten unha responsabilidade cos cidadáns e un compromiso de calidade coa sociedade.

Lin unha vez do mestre do documental brasileiro, Eduardo Coutinho, que o documental foi, é , e sempre será marxinal. Eu non quero ter esa proxección de futuro para o xénero, pero o circuito pechado dos festivais, a presencia pouco relevante na TV, e as continuas limitacións impostas no proceso creativo pola propia industria, son fortes barreiras para o crecemento dunha nova xeración de documentalistas que ten serias dificultades para crear e sobretodo, para chegar ó público. Non construímos as historias para nós, as historias son para outros. Creo que o documental por sobradas razóns merece outra atención. Pero mesmo así, é un dia para celebrar, a cultura transfronteiriza de Galicia-Portugal e a nosa realidade en común terán representación na nosa tele.

Parabéns a Galicia Doc.

Hai esperanza.

sábado, 17 de abril de 2010

MULLERES DA RAIA RECIBE O PREMIO MESTRE MATEO AO MELLOR DOCUMENTAL DA ACADEMIA GALEGA DO AUDIOVISUAL

4 comentarios






Mulleres da Raia, finalista na VIII edición dos Premios Mestre Mateo da Academia Galega do Audiovisual na categoría de Documental. Esta comunicación chegou no mes da Primavera, na semana do meu aniversario que celebraba a miña maneira, filmando nun taller documental a segunda parte dun retrato que está en construcción. A boa nova marzal, inesperada, levoume aos meus primeiros pasos no documental, a intensidade daqueles dias nos que todo era incerto. Longas horas de autoformación e kilómetros sen conta. Un forte compromiso coa memoria e unha dedicación sen medidas. Paso a paso, de vagar, para que os xestos e as palabras xurdisen de dentro. Paseniño pero sen perdelo ritmo da constancia. Estas mulleres abrironme o camiño e os ollos ó mundo. Agora, non podo volver atrás.

Mulleres da Raia resultou gañadora do Premio Mestre Mateo ó mellor Documental 2009. A forza delas acompañoume naquela noite de recoñecemento. O premio é das Mulleres da Fronteira que construíron comigo esta historia de superviventes, como somos todos nos días de hoxe. É de todos aqueles que acreditan nun discurso cinematográfico que se articula sobre a realidade. É de todos os que me teñen amparado nesta travesía cinematográfica. Sigo remando para contar historias, con vós e para vós.

Gracias aos compañeiros da profesión polo seu recoñecemento.